Wia in Kana a Hochzeid woa
==========================
Aum nexdn Dog woa aum Laund draussd, in Kana, a Hochzeid. In Jesus sei Mamsch hod aa wos z duan ghobt duat.
Und da Jesus woa midsaumt seine Hawara eiglond. Und wia nocha da gaunze Wei fabuzzd gwesn is, pfiat di God, Lakkal, hod d Maria zan Jesus xogd:"Du, de haum nix mea zan Tschechan!"

Drauf da Jesus:"No und? Wos hausd n weng den mi au, Mamsch? I bi nu ned so weid."
Owa d Maria hod eam des ned oognuma, und weng den hod s xogd zu de Binkln, wos duat seawiad haum:"Duaz, wos a eich schoffd!"
Jezd san duat owa sex schdaanane Biidschn fia s Wossa gschdauntn, damid si d Leid d Pfodn ooschwaam kenan, wia s bei d Judn da Gheadsi woa; a schene boa Lita wean in a jede einegaungan sei.

Und da Jesus hod xogd:"Füüz de Kau'ln au mid Wossa."
Und d Binkln haum s bla'lfoe augfüüd.
Daun hod a augschoffd:"Und jezd nemz an Schepfleffe foe und lossz in Köllamaasda gustian." Oesdan, haum s den a Lakkal brochd.
Wia da Kölamaasda owa des Wossa kost hod, wos in wäratn a Wei wuan is, und wäu a jo ned schmekn kenan hod, fo wo das s kumd (d Binkln mi n Schepfleffe haum so scho gwussd, ä gloa), hod a si in Breitegam ruafm lossn und hod eam s Scheazl owagrissn: "Heasd, sei ma ned baasch, owa a jeda, dea wos a bisl a Hian in Schä'l hod, lossd zeaschd amoe in Gumpoeds auffoan, und daun, waun s ä scho ole in Öö san, haud a r eana in Brinnaschdrassla zuwe. Und du Wää hebsd da s guade Drepfal zan Schluß auf!"
Dera oat hod da Jesus in Kana, draussd in Galiläa, zan easchdnmoe wos Iwanatialix zaumdraad und hod zaagd, wea r a is, und seine Hawara san gschdauntn auf eam.


aus: da jesus und seine hawara
von wolfgang teuschl